last one

the last malariapill, the last sunday, the last week, the last cleaning-up, the last day at work... five months are over, faster then i could ever believe, but it is how it is, next sunday i`ll be back home.

and all i can say (my last words somehow) is:

webale nnyo
thank you very much
muchas gracias
danke vielmals
merci schön

es rägnet (edition spoken skript)

Alles esch Bruun gsi. D Erde esch Rotbrunn, das Rotbrunn wo mer könnt vo de Belder im Fernseh. "Rot vo eusem Bluet wo vergosse worde esch", seid de Musei, "ned för eus, sondern gäge eus, emmer gäge eus." Und jetzt, jetzt wo nömme gäge si gchrieged werd, chriegeds gäge enand und di wo eri Helf wörded bruche bechöme si ned, d Waffe händ si zwiit usenand brocht. Aber das esch jetzt, i dem Momänt, im Hendergrond well jetzt, jetzt i dem Moment rägnets.
Es rägnet, grad so als ob de Herr det obe wedermol wett zeige wer de Chef esch. Aber niemmert esch ehm bös. Di Eine danked im Gott und di Andere im Allah, esch eigentli ned so wechtig, dänk ech mer, aber en Säge esch es wörkli, de Räge, well jetzt wos rägnet eschs Bruun weg, de Räge hed de Staub vo de Bäum gwäsche und d Blätter wachsed weder und Si werded grüen und...
Es rägnet. Es rägnet, so das d Teerstross wo dors Dorf god en Fluss worde esch und d Piste wo zum Dorf fühert morn no es betzli holpriger esch. So das ned mol meh de Traktor öber de Fäldweg cha fahre und so das mer scho noch eim Schrett Verosse bes uf d Chnoche nass esch und...
Es rägnet. Es rägnet ufs Blächdach, so das mer d Gspröch under em Dach chuum verstohd. So das jedi Wendböe de Räge dor de Understand blost, so das ned mol meh s Blächdach gnue Schotz bietet und...
Es rägnet. Es rägnet i decke, schwere Tropfe, ned so wien is könne vo Diheime, es esch en andere Räge do, intensiver, es Extrem in sech und met meh, vell meh, verbonde als bi eus, Diheime. Heilbrenger, Glöck, Läbe.
Es rägnet, zwar en Woche spöter als sosch, aber das esch jetzt glich, well jetzt, jetzt wos rägent, gsehd d Zuekunft besser us. S Mais wachsd weder, und scho bald werd mers ernte chönne, s Grass wachsd weder und d Küeh und d Geisse händ gnue z Ässe und si werded weder gnue Melch geh und...
Es rägnet. Es rägent, so das mer noch es paar Moment scho vergässe hed, wie lang das mer druf gwartet hed. So das es chüehl werd, fasch scho chalt wenn mer met Geschter verglicht, und d Lüüt gsähnd loschtig us i erne Pullis und Jacke. Di Lüüt wo Träum händ vo anderne Länder, und ech froge mi öbs äch i erne Träum de so chalt esch wis ame esch dete, vell chälter als do je werd si und...
Es rägnet. Es rägnet, grad so das mer chönt meine es sett för alli lange, aber es werds ned, well es rägnet, aber ned öberall.